Masinsinang iniim­bestigahan ng pulisya ang naganap na pagpaslang sa isang lalaki na asawa ng isang tagalitis ng gobyerno kamakalawa ng umaga sa Barangay Santiago, Solsona, Ilocos Norte.

Si Edward Chan, 38, ay isinugod pa sa ospital para malapatan ng lunas ngunit siya’y hindi na umabot ng buhay dahil sa mga tama ng bala sa ulo at iba’t ibang parte ng katawan nito.

Ayon kay Senior Supt. Mario Chan, director ng Ilocos Norte Provincial Police Office, pauwi na sana ang biktima nang siya’y tambangan ng hindi mabilang na kalalakihan.

Hindi naman sinabi ni Chan kung kaanak nito ang biktima o hindi. Ang biktima ay mister ni Laoag City Prosecutor Gina Chan.

“Mga dakong alas-6:05 ng umaga ng siya’y tambangan. Kagagaling lamang niyang magdeliber ng itlog,” ani Chan.

Ang biktimang si Chan ay nagnenegosyo ng itlog at marami itong sinusuplayang kliyente sa nasa­bing lungsod at karatig bayan.