Pinigil nina Randy Holcomb at Sonny Thoss ang
Parada, at naungusan ng Alaska ang Red Bull sa panalong 101-90 kagabi
sa Araneta Coliseum.
Sa gabing inaalat sa 1-for-11 free throw shooting si Holcomb, nagawa
pa ring manaig ng Aces para umakyat sa 3-6 win-loss record. Ang
Red Bull naman ay nahatak sa 7-3, kasosyo ang Talk N’ Text
sa tuktok ng standings ng 2007-08 SMART PBA Fiesta Conference.
Nagawa na ring maiganti ng Aces ang 100-97 overtime loss nila sa
Barakos noong April 19 sa Laoag City.
“Randy is the best shooting import in the conference. He is
also the worst free throw shooter,” natatawang pahayag ni
Aces coach Tim Cone pagkatapos ng laro.
Salitang binulabog ng depensa nina Holcomb at Thoss ang dambuhalang
import ng Barakos na si Adam Parada, at halos hindi ito nakadiskarte
sa huling tatlong quarters ng laro.
Bagama’t tumapos ng team-high 27 points si Parada, sa first
quarter lang ito nanalasa sa pinakawalang 15 points at nadiyeta
na sa tatlo, apat at limang puntos sa second, third at fourth quarters,
ayon sa pagkakasunod, sa oras na naghahabol pa mandin ang Barakos.
Kapag nalayo sa paniningin ni Holcomb, si Thoss naman ang nakadikit
kay Parada. Hindi nga lang napigilan si Parada sa ilalim na humablot
pa rin ng 23 rebounds.
“Sonny is becoming a real problem for the other teams now,
he’s so very versatile,” dagdag ni Cone.
Sa pagtatapos lang ng first quarter nakadikit ang Red Bull sa 27-23,
at nang maposasan sa opensa si Parada sa tatlong sumunod na quarter
ay unti-unti nang lumayo ang Aces.
Natapos ang first half na lamang ng 11 ang Alaska, 46-35, at pagpasok
ng fourth ay hawak pa rin ang bentahe sa 74-62.
Sina Celino Cruz at Jojo Duncil ang nakipagpalitan ng basket sa
Aces sa fourth period, pero hindi nila kinaya ang pamatay-sunog
na mga bitaw nina Jeffrey Cariaso na siyam sa kabuuang 11 points
ay pinakawalan sa last period,.at Willie Miller.
Parang import na namang lumaro si Miller sa tinipong 24 points,
12 dito mula sa first period, at nagpakawala pa ng six assists.
May 21 points, 15 rebounds naman si Holcomb, habang nagdagdag pa
si Thoss ng 12 points at 13 rebounds.
Huling lumapit sa anim na puntos ang Barakos sa 87-81 pagkatapos
ng tres ni Mike Hrabak, pero hanggang doon na lang. Dalawang puntos
lang din ang kinaya ni Cyrus Baguio sa fourth tungo sa kabuuang
17.
Anim na beses bumiyahe sa foul line si Holcomb sa huling apat na
minuto ng laro, pero anim na beses din siyang sumablay.
|
